Rooh Ki Haqeeqat | Islam Mein Rooh Ka Raaz, Zindagi Aur Maut Ke Baad Safar

روح وہ ازلی راز ہے جس کے ذریعے مٹی کا پیکر انسان کہلاتا ہے جب اللہ تعالیٰ نے انسان کی تخلیق کا ارادہ فرمایا تو سب سے پہلے جسم کو مراحل سے گزارا مٹی پھر گارا پھر ٹھیکرا نما ڈھانچا مگر یہ سب محض ایک خاموش وجود تھا نہ اس میں شعور تھا نہ حرکت نہ پہچان پھر وہ لمحہ آیا جسے قرآن نے نہایت عظمت اور جلال کے ساتھ بیان کیا کہ اللہ نے اس میں اپنی طرف سے روح پھونکی یہی وہ لمحہ ہے جب بے جان جسم زندہ ہو گیا جب آنکھ دیکھنے کے قابل ہوئی دل محسوس کرنے لگا عقل نے سوال اٹھائے اور انسان۔ انسان بن گیا ۔روح کو اللہ تعالیٰ نے کسی مادی عنصر سے پیدا نہیں کیا نہ وہ آگ سے ہے نہ نور سے نہ مٹی سے بلکہ وہ اللہ کے امر سے ہے امر کا مطلب یہ ہے کہ وہ تخلیق کے اُن قوانین سے ماورا ہے جنہیں انسان سمجھ سکتا ہے اسی لیے جب نبی کریم ﷺ سے روح کے بارے میں سوال کیا گیا تو اللہ نے فرمایا کہ روح میرے رب کے حکم سے ہے اور تمہیں اس کے علم میں سے بہت تھوڑا دیا گیا ہے اس ایک جملے میں انسان کی علمی حد بھی واضح کر دی گئی اور روح کی عظمت بھی۔ روح کوئی تجربہ گاہ میں پرکھی جانے والی چیز نہیں یہ وہ حقیقت ہے جسے صرف اثرات سے پہچانا جاتا ہے ذات سے نہیں ۔روح کی تخلیق کا انداز یہ بتاتا ہے کہ انسان محض حیوان نہیں بلکہ ایک امانت دار ہے اللہ نے روح پھونک کر انسان کو اپنی پہچان کا ظرف دیا خیر و شر کی تمیز عطا کی اور یہ صلاحیت دی کہ وہ اللہ کی طرف متوجہ ہو سکے روح کے اندر ایک فطری کشش رکھی گئی ہے جو اپنے اصل کی طرف لوٹنا چاہتی ہے اسی کشش کو کبھی انسان سکون کہتا ہے کبھی بے قراری کبھی دعا کی تڑپ اور کبھی آنسوؤں صورت میں عبادت روح کی حقیقت یہ ہے کہ وہ جسم کی قیدی نہیں مگر دنیا میں اسے جسم کے ساتھ وابستہ کر دیا گیا ہے روح دیکھتی ہے مگر آنکھ کے بغیر نہیں سنتی ہے مگر کان کے بغیر نہیں چاہتی ہے مگر دل کے بغیر نہیں یہ جسم اس کے لیے ایک سواری ہے ایک لباس ہے ایک ذریعہ ہے جب یہ لباس پرانا ہو جاتا ہے یا آزمائش کا وقت مکمل ہو جاتا ہے تو روح کو اس سے الگ کر لیا جاتا ہے یہی موت ہے مگر روح کے لیے فنا نہیں بلکہ ایک دروازہ ہے روح باقی رہتی ہے، شعور کے ساتھ احساس کے ساتھ، اپنے اعمال کے اثرات کے ساتھ روح نہ نیکی سے پاک ہوتی ہے نہ گناہ سے داغدار بلکہ اعمال اس پر اثر انداز ہوتے ہیں ذکر اسے جِلا دیتا ہے گناہ اسے بوجھل کر دیتے ہیں سچائی سے یہ مضبوط ہوتی ہے ظلم سے یہ زخمی ہوتی ہے۔ اسی لیے انسان کا باطن اگر بے چین ہو تو اصل میں روح فریاد کر رہی ہوتی ہے اور جب دل کو سکون ملے تو یہ روح کی تسکین ہوتی ہے دنیا کی کوئی چیز روح کو مکمل سیر نہیں کر سکتی کیونکہ وہ دنیا کی نہیں اپنے رب کی طرف منسوب ہے روح کی سب سے بڑی حقیقت یہ ہے کہ وہ اللہ کی طرف سے آئی ہے اور اللہ ہی کی طرف لوٹنی ہے دنیا میں اسے آزمایا جاتا ہے جسم کے تقاضوں نفس کی خواہشات اور شیطانی وسوسوں کے درمیان اگر انسان روح کی آواز کو پہچان لے تو یہی روح اسے بلندی کی طرف لے جاتی ہے اور اگر وہ اسے نظرانداز کرے تو یہی روح خاموش گواہ بن کر قیامت کے دن حقیقت ظاہر کر دے گی یوں روح انسان کے اندر اللہ کی امانت ہے ایک مقدس چراغ جو ایمان سے روشن ہوتا ہے غفلت سے مدھم پڑتا ہے اور قربِ الٰہی سے اپنی اصل روشنی میں واپس آتا ہے۔ یہ نہ مکمل طور پر سمجھی جا سکتی ہے نہ نظر انداز کی جا سکتی ہے کیونکہ انسان کی اصل پہچان اسی روح سے ہے اور اسی کی کامیابی دراصل انسان کی کامیابی ہے