Batin Ka Firon: Nafs, Takabbur Aur Insan Ki Roohani Jung

فرعون کوئی پرانی لاش نہیں وہ زندہ ہے سانس لیتا ہے اور انسان کے اندر تخت نشین رہتا ہے وہ نظر نہیں آتا مگر فیصلے اسی کے ہوتے ہیں وہ زبان سے بولتا نہیں مگر لہجے اسی کے ہوتے ہیں باطن کا فرعون اس لمحے پیدا ہوتا ہے جب انسان خود کو حق کا مالک سمجھ لے جب وہ سمجھے کہ سچ اس کی مٹھی میں ہے اور باقی سب اندھیرے میں ہیں یہ وہ فرعون ہے جو آئینے میں اپنا عکس دیکھ کر بھی اپنے عیب نہیں پہچانتا اور سچ سامنے ہو تو اسے تاویل کی دھند میں چھپا دیتا ہے فرعون کو عبادت سے خطرہ نہیں اسے عاجزی سے خطرہ ہے وہ ذکر کو قبول کر لیتا ہے مگر جھکنا قبول نہیں کرتا وہ چاہتا ہے کہ انسان اللہ کو مانے مگر اس شرط پر کہ انسان خود بھی کچھ بن کر رہے اسی لیے اس کی نماز میں انا ہوتی ہے اس کے روزے میں غرور ہوتا ہے اور اس کی نیکی میں خودنمائی فرعون کا سب سے بڑا جادو یہ ہے کہ وہ خود کو دین دار بنا کر پیش کرتا ہے وہ حق کے الفاظ بولتا ہے مگر روح کے بغیر وہ آیات کو ہتھیار بناتا ہے اور اخلاق کو نقاب جب اللہ کسی انسان سے خیر کا ارادہ کرتا ہے تو اس کے باطن میں موسی بھیج دیتا ہے یہ موسی کبھی ضمیر کی آواز بنتا ہے کبھی کسی بزرگ کی نصیحت کبھی کسی صدمے کی شکل اور کبھی ایسی تنہائی جہاں انسان خود سے بھاگ نہیں سکتا باطن کا فرعون انکار کرتا ہے وہ کہتا ہے یہ محض اتفاق ہے یہ کمزوری ہے یہ وقتی کیفیت ہے مگر موسی بار بار آتا ہے کیونکہ اللہ فرعون کو فوراً نہیں ڈبوتا وہ مہلت دیتا ہے شاید انسان جھک جائے شاید انا ٹوٹ جائے جب انسان ہر نشانی کو رد کر دیتا ہے تو پھر سمندر کھلتا ہے یہ سمندر باہر نہیں اندر ہوتا ہے اضطراب بے سکونی خوف اور تنہائی انسان سب کچھ پا کر بھی ڈوبنے لگتا ہے فرعون کی ہلاکت شور سے نہیں ہوتی وہ خاموش مر جاتا ہے وہ زندہ رہتے ہوئے روحانی طور پر مر چکا ہوتا ہے باطنی فرعون کو مارنے کے لیے کسی خاص ورد کی ضرورت نہیں ایک سچا لمحہ کافی ہے وہ لمحہ جب انسان کہہ دے میں غلط ہو سکتا ہوں مجھے ہدایت کی ضرورت ہے یہ جملہ فرعون کے لیے زہر ہے یہ عاجزی اس کے تخت کو ہلا دیتی ہے جس دن انسان سچ میں جھک جاتا ہے اسی دن باطن کا فرعون کمزور پڑ جاتا ہے اور جب فرعون مرتا ہے تو روح آزاد ہو جاتی ہے پھر انسان عبادت نہیں کرتا عبادت میں رہتا ہے پھر وہ سچ بولتا نہیں سچ ہو جاتا ہے یہی اصل نجات ہے یہی باطن کی فتح ہے… اللہ پاک ہمیں تکبر سے محفوظ رکھیں۔آمین اگر پوسٹ پسند آئی ہو تو شیئر اور فالو کریں۔جزاک الل